قال دكتور رامي نخلة زميل الكُلية الملكية البريطانية لأمراض الباطنة ومناظير الجهاز الهضمي لميجا اف ام إن تركيز المياه فى الجسم بيوصل من 60% لـ 70%، وعند الطفل بيوصل من 75% لـ 80%، و الميا بتساعد على الهضم، وأحيانا الجسم بيترجم العطش على إنه جوع؛ وبالتالى بيدي إشارات بالجوع، فبدل ما تروح تشرب تلاقى نفسك رايح تاكل، جاء ذلك خلال مداخلة هاتفية لبرنامج خلاص صحينا مع مارينا المصري على ميجا FM.
وأضاف المياه بتساعد على التركيز، وتليين المفاصل، وبتقلل من ظهور التجاعيد، وقلة شرب المياه بيسبب الإصابة بالإمساك، والكسل، والوخم، قلة التركيز، آلام القولون العصبي.
وتابع الجسم محتاج فى اليوم لتر ونص ماء، يعني من 6 لـ 8 كوبايات فى اليوم، والمياه لازم تعدى على مراحل معينة من الفلترة، وبالتالى مش محتاجة انها تتغلى قبل ما تتشرب، و الميا المعدنية غنية بالصوديوم والأملاح عشان كده بلاش نزود منها، لإنه أكتر من لتر ونص منها فى اليوم بيسبب احتباس الماية فى الجسم خصوصا مع المصابين بفشل فى عضلة القلب أو الفشل الكلوى.
واختتم قائلا الميا الموجودة فى الخضروات والعصائر الجسم مش بيتمصها بشكل مباشر ولكن بتساعد على الهضم.
