أوضح الفنان أحمد سلامة، حقيقة الخلاف بينه وبين ابنته سارة سلامة، بسبب ملابسها الجريئة في المسلسلات وجلسات التصوير.
وقال أحمد سلامة خلال لقاءه في برنامج “نص الكلام”، المُذاع عبر قناة النهار: “ماحصلش خلاف، ولكن عشان أسيطر على جيل السوشال ميديا والعالم المفتوح، دي مسألة صعبة جدًا، وفعلًا السوشال ميديا بتربي معانا، كان زمان عندما إمكانية نقفل الحنفية يشوفوا مين ومايشوفوش مين، لكن الجهاز اللي أنا شايفه نقمة خلى أفكار الشباب منفتحة وشايفين إن كل حاجة عادي”.
وتابع: “أنا قولت لسارة ماتعملش كدة تاني لكن مش لدرجة خلاف، لكن كل الأفكار اللي انت وجيلك شايفنها تحرر، ده برة مش هنا إحنا مجتمع شرقي في الآخر، ماينفعش نتخطاه، هي وجهة نظرها إننا لو عملنا اللي بيعجب الناس ولبسنا اللي بيعجبهم هبقى أنا مخنوقة، لكن أنا مابعملش حاجة غلط.
أحمد سلامة: اتهاجمت بسبب شورت سارة في مسلسل ابن حلال
واستطرد: “عشان أقنع سارة بوجهة نظري ده عمل ضغط جامد جدًا، هي في مسلسل ابن حلال لبست شورت، واتهاجمت وأنا اتهاجمت بسبب الحكاية دي، وده كان أول عمل تعمله، وستايلست المسلسل قالتلها تلبسه، وهي ماتعرفش حاجة وكانت بتسمع الكلام”.
وأضاف: “بنتي وقتها كان عندها 18 سنة وكانت صغيرة وماعندهاش الخبرة وكانت عبد المأمور، وأنا اتهاجمت مؤخرًا بسبب سارة، ولكن بحاول أسيطر”.
