وجهت الفنانة دينا الشربيني، التهنئة للمصريين بمناسبة الاحتفال بأعياد الميلاد، مضيفة: “طلعت من 2022 بشخصيات كتير أثرت فيا، وإن شاء الله السنة الجاية تبقى أحلى، ومتفائلة جدا بـ 2023”.
وأضافت “الشربيني”، في مداخلة هاتفية ببرنامج “خلاص صحينا”، تقديم مارينا المصري، المذاع عبر أثير موجات راديو “ميجا اف ام”، اليوم الإثنين، قائلة: “درس السنة دي هو إني على قد ما بدي وقت لشغلي وحياتي لازم أركز برضه مع أهلي وأديهم من وقتي وطاقتي بشكل أكبر شوية”، متابعة: “أنا من الشخصيات اللى بتحب تصحى بدري، رغم إن العمل الفني مواعيد التصوير فيه متغيرة ما بين الليل والنهار”.
مسلسل دينا الشربيني القادم في رمضان
وردًا عن سؤال ايه أكثر الأعمال الفنية التي أعجبتها في عام 2022، ردت دينا الشربيني قائلة: “في أعمال كتير عجبتني السنة دي، بس أكتر عمل عجبني هو مسلسل زينة “الليلة واللى فيها”، ونفسى أسلط الضوء أكتر على الأطفال والمرأة، عشان كده عجبني جدا مسلسل “فاتن أمل حربي” لنيللي كريم، وأكتر عمل استمتعت بيه هو مسلسل “كامل العدد”، واللي بصوره حاليا وهيتعرض فى رمضان 2023”.
وأكملت: “أنا مش بتابع السوشيال ميديا، بس بحب التيك توك أوي، وكلمة “تريند” بالنسبة لي مرعبة، ومش بحبها أبدا، ونفسي أجرب الإذاعة جدًا، ووحشتنى أيام لما كنت مذيعة”.
واختتمت قائلة: “أكتر حاجة اتغيرت فيا السنة دي هى إن عصبيتي بقت أقل، ودي حاجة مش سهلة، لأني شخص عاطفي جدا، وكل مشاعرى بتبان عليا، وأنا الحمد لله على طول كويسة نفسيًا، وبقيت اقدر اعمل كنترول على مشاعري، ومش بسمح لأي حاجة تزعلني”.