نورهان ضحية لافتة كوبري أكتوبر: أتحشرنا تحت الحديد أنا وجوزي وعيالي

قالت نورهان ضحية لافتة إعلانات كوبري أكتوبر التي سقطت جراء العاصفة الجوية التي تعرضت لها القاهرة قبل أيام قليلة، حيث سقطت لافتة إعلانات ضخمة تحمل إعلانا لنجل الفنان محمود عبدالعزيز على كوبري أكتوبر أعلى عزبة أبو حشيش في الشرابية، مما نتج عنها مصرع شخص وإصابة 4 آخرين جراء الحادث، وتم غلق كوبري أكتوبر بالإتجاهين.

ضحية لافتة كوبري أكتوبر تروى تفاصيل الحادث

وقالت نورهان ضحية لافتة كوبري أكتوبر، «أنا خرجت برفقة زوجي وأولادي لأنه كان أجازة في اليوم ده عشان نزور والدته، وفجأة وأحنا على كوبري أكتوبر، معرفتش إيه اللي حصل، وأخر حاجة فاكراها إن كان في تراب في الجو، وبعدين حسيت فجأة إنى شبه حاسة بالدنيا وحواليا ناس كتير وحديد كتير البنت الصغيرة بنتي معايا وإبني مش معايا ولا جوزي، قعدت أصوت ومش عارفة أنا فين طيب هما فين راحوا فين، لقيت الناس بيقولوا متخافيش هما هنا وأهدى بس وبعدين غبت عن الوعي وفوقت لقيت إبراهيم جوزي قدامي وبيديني الولد».

وتابعت نورهان ضحية لافتة كوبري أكتوبر التي سقطت جراء العاصفة الترابية «أنا بنتي حليمة عندها ثلاث سنوات ونصف، وإبني زكريا 10 شهور، وكنا في العربية سوا مع والدهم اللي كان سايق، وحليمة هي اللي حكت على كل حاجة لأني مكنتش فاكرة حاجة، وقالت أن كان في تراب في الجو وأنها أتخبطت في العربية جوه، وهي دلوقتي من أثار الرعب أصيبت بالتبول اللاإرادي، والولد كانت رأسها متعورة وإبراهيم قالي أنه كان مزنوق في حديد العربية».

ضحية كوبري أكتوبر: فجأة فقدت الوعي

وأضافت نورهان قائلة «روحت المستشفى ودخلوني غرفة العمليات وخيطوا دماغي وإيدي وعملوا أشعة مقطعية قالوا عندي إرتجاج وتجمع دموي وقالوا لازم أقعد في الرعاية عشان يشوفوا إيه الدنيا وطبعا الدكاترة حذرتني لو رجعت أو دوخت لازم أقول عشان يعرفوا في مضاعفات تاني ولا لا قولتله أنا تعبانة جدا أديني بنج كلي قالي مش هينفع لازم تكوني فايقة معانا وادوني حاجة كنت شايفة كل حاجة بتحصل».

وأختتمت نورهان قائلة «عايزة حق عيالي وخضتهم وخوفهم والعربية دي انا مش عارفة نعمل ايه التعويض عند ربنا قرار النيابة قال ان الترخيص منتهي طيب اسرة أتصابت وتكاليف المستشفى والعربية كل ده ماثر معايا جدا انا كنت بودي البنت المدرسة واجيبها بالعربية اعمل ايه ادفع لها 13 الف جنيه في السنة وباباها يسيب شغله ويروح يوديها».

زوجة نورهان: العربية أطبقت بسبب اليافطة

وقال إبراهيم زوج نورهان ضحية كوبري أكتوبر «أنا كنت سايق وشوفت الموضوع بالكامل وربنا ألهمني إني أكون صاحي وفايق عشان أقدر أطلعهم على الأقل كنا رايحين لوالدتي مرة واحدة شوفت الحديد في كل حتة والدم ونورهان مغمى عليها ومكنتش فاهم في أيه وشايف العربية مطبقة وبحاول أفوق نورهان والعيال ورا والعربية من كتر الحجم اللي عليها مضلمة والحمد لله الناس ساعدتني طلعت إيدي والناس ساعدتني وسحبت بنتي وإديتها لواحد وحاولت أطلع الواد معرفتش مش عارف أوصله والواد مش مطلع صوت وصاج العربية علينا مكنش في قدامي غير إني اطلع نورهان وطلعت من شباك العربية لأنه المكان الوحيد اللي كان ينفع اطلع منه وسحبت نورهان من الشباك والناس جت ربنا بعتهالي وستات اخدوها ومطلعتش صوت ولا اي حاجة ومش عارف هي فيها ايه».

وتابع زوج نورهان ضحية كوبري أكتوبر «القرار كان إني مش عارف أعمل أيه كنت سامع صوت حليمة لكن نورهان وزكريا مكنتش سامع ليهم صوت ومعرفتش أطلعه وخرجت قولت لهم حاولوا تساعدوني والناس كانت خايفة لأنها كانت بتكمل إنهيار وواحد بيقول حاسبوا الكهرباء وأنا لازم أدخل وأحاول أطلعه حاولت أشيل الكامرات بتاعت الحديد معرفتش، وواحد رفيع قالي وسع قالي ماتخافش الواد بيعيط وكله كان خايف يقرب أحسن اللوحة تقع تاني وحاولت أنا والشاب نطلعه وطلعته اخيرا في وسط الضلمة دي وكانت العربية ضلمة».

وأختتم إبراهيم حديثه قائلا «الشرطة كانت جت ووقفت معانا وقالوا ماتخافوش ومبقتش مين متعور ولا في ايه والناس واقفة علينا ونورهان عليها دم وانا عليا دم ببص على العربيات اللي جنبي منها العربيات الرمادي باين منه حتة صغيرة وكله بيحاول بإيده وناس خايفة تتكهرب وناس خايفة اللافتة تقع تاني وعايز اساعد لأني لسه خارج وحاسس ايه اللي بيحصل جوه والشرطة ودتنا المستشفى وصلنا المستشفى في حدائق القبة بعربية الشرطة قبل الاسعاف ما تيجي واول ما وصلنا عملوا كل الاسعافات وتقريبا الدكتور قالي 10 غرز في رأسها و17 في إيديها ربنا كرمنا بكل حد وقف معانا».