المذاكرة سلوك غير محبب لبعض الأشخاص على الرغم من فوائده المتعددة لتنمية المخ واكتساب مهارات ومعلومات جديدة، لكن بتحتاج تعرف بعض الخطوات اللي تساعدك تذاكر صح وتتجنب أخطاء المذاكرة سواء على مدار السنة أو قبل الامتحانات.
تشجيع نفسك على البدء في المذاكرة
- دور على سبب للمذاكرة وحدد هدفك في الوصول لوظيفة معينة عشان يساعدك في التغلب على الزهق والتوتر
- الإنجاز بيساعد على الثقة بالنفس وتقسيم المذاكرة لمجموعة أهداف صغيرة (يومية/ أسبوعية/ شهرية) وتحقيقها هيشجعك أكتر
- كافيء نفسك بشيء بتحبه أو قضاء وقت ممتع في هواية أو مع أصدقاءك واستخدم الدراسة كوقت لنفسك وفي تحسين شخصيتك ومستقبلك
- كل ما كان وقت المذاكرة فعال ومنظم هتقدر تنمي شيء بجانبها بتحبه وممتع بالنسبة لك ويزود مهاراتك
- اختار مكان هادي يساعدك على التركيز سواء في البيت أو مكان عام زي وورك سبيس أو مكتبة أو كافيه ويفضل مكان المذاكرة يكون بعيد عن السرير عشان تقلل إحساسك بالنوم
- تجنب أي مصدر للتشتت زي الموبايل والتلفزيون والأغاني والراديو غير مكان المذاكرة من وقت للتاني عشان تحارب الشعور بالملل
- استخدم أدوات دراسية ملونة زي الأقلام والورق والنوتس وأقلام التحديد
- إضافة اللون للمذاكرة هيخليها ممتعة وبيساعد في تركيز المعلومات عن طريق تنشيط منطقة الذاكرة البصرية في المخ
جرب تشغل مزيكا هادية زي الكلاسيكية أو الموسيقى التصويرية للأفلام والمسلسلات لو هتساعدك على التركيز بس ضروري تظبط الصوت على مستوى متوسط عشان تحافظ على تركيزك - ارسم أشكال للموضوعات والملاحظات لأنه هيساعد في التذكر أكتر
- مثلًا لو بتذاكر أحياء ارسم الخلايا وأجزاء الجسم ولو أدب ارسم مشهد تخيلي للقصة أو الشعر
تقليل الإحساس بالملل وقت المذاكرة
- اربط بين المواد التعليمية وفضولك بالبحث عن الموضوع بزوايا مختلفة لأن ده ممكن يحمسك
- المشي أو الحركة أثناء المذاكرة هيقلل إحساس انخفاض الطاقة والزهق وبيساعد على تخزين المعلومات
- قسم المذاكرة لأهداف معينة زي إنك ماتتحركش من المكتب إلا لما تحل مسألة حساب وكافئ نفسك بعدها
- اربط بين المعلومات والأغاني أو أحداث شخصية أو معلومات تعرفها كويس
- اختار مكان هادي ومناسب للمذاكرة وفيه كل أدواتك وبعيد عن مصادر التشتيت
- تجنب الأوضاع المريحة بشكل زايد زي المذاكرة على السرير لأنها هتخليك تنام
- حدد الحاجات اللي عايز تخلصها قبل ما تبدأ لأن ده هيساعدك تنجز أسرع
- غير المادة اللي بتذاكرها كل ساعة عشان تنوع وخلي المادة المفضلة ليك للآخر
- اختار الوقت اللي بتكون فيه نشيط وخصص معاد معين للمذاكرة عشان جسمك يتعود يدخل في مود المذاكرة فيه تلقائيا
- خد بريك كل ساعة ومارس فيه نشاط حركي أو أكل بروتين وألياف لأن ده هيساعدك على النشاط واليقظة وهيزيد تركيزك
- لو المادة مملة.. خليها ممتعة باستخدام البطاقات التعليمية أو تطبيقات المذاكرة وافتكر إن الدراسات أثبتت إن إدعائك إن المادة ممتعة هيساعدك تقتنع بده مع الوقت
- كافئ نفسك لو التزمت اليوم كله عشان تقدر تنتظم على الروتين والتزم بكتابة الملاحظات والمعلومات الأساسية أثناء قراءة المادة هيزود تركيزك ويقلل إحساسك بالملل
تجنب أخطاء المذاكرة
- ضغط وقتك بالمذاكرة طول اليوم بدون فترات راحة بيقلل استيعابك وتركيزك وبيزود الملل
- دراسة بتأكد إن قلة النوم وعدم ظبط الساعة البيولوجية بيأثر على درجاتك وبيزود فرص الخطأ
- بلاش تشغل أغاني جنبك وإنت بتذاكر خصوصًا لو بتحفظ محتوى فيه تفاصيل كتير
- الأغاني بتزود إبداعك وقدرتك على الابتكار بس بتضعف قدرتك على الحفظ وبتسبب تداخل المعلومات
- بلاش تستغرق في سؤال زمايلك عن إجابات لأسئلة وابحث عن الحل بنفسك
- متابعة مواقع التواصل أثناء المذاكرة بتزود توترك وتشتيتك وبتقلل تركيزك
- الخبراء بيقولوا إن نظرك بالعين على الكلام مش كفاية ولازم تقرأ الكلام أو تكتبه بإيدك عشان يثبت في مخك
- اختيار أكتر من مصدر للمذاكرة بيسبب تضارب في المعلومات وبيقلل قدرتك على المراجعة بسلاسة
- مذاكرتك على السرير أو في مكان غير المكتب بتخليك تاخد وقت أطول في استيعاب المعلومة
- التأجيل والكسل هيعطلوك عن مراجعة كل أجزاء المنهج قبل الامتحان
- دراسة في جامعة ستنافورد بتقول إن مذاكرة أجزاء مختلفة عن بعضها في وقت واحد بيقلل استيعاب المعلومات كلها
- الإفراط في الكافيين بيسبب الصداع وقلق وبيأثر على الصحة وبينعكس على مذاكرتك
- اختار الأصدقاء اللي تستفيد وإنت بتذاكر معاهم وخليها مرات محدود مش طول الوقت
- عدم تخطيطك للمذاكرة وعمل خطة بمواعيد محددة لإنجاز اللي وراك هيقلل فرص إلمامك بكل تفاصيل المنهج
- مذاكرتك بدون مراعاة شكل الامتحان هتأثر على طريقة استيعابك للمعلومة وده هينعكس على درجاتك
- بتختلف طريقة مذاكرتك لو الامتحان كله أسئلة مقالية أو اختيار من متعدد أو لو بيجمع كل أشكال الأسئلة
مقاومة الرغبة في النوم وقت المذاكرة
- اتحرك 10 دقايق متواصلة على الأقل كل 50 دقيقة
- خلي إضاءة المكان مريحة وقوية في نفس الوقت عشان تساعدك على التركيز واليقظة
- بلاش تذاكر وإنت نايم على السرير أو في وضع غير مريح
- دراسة بتأكد إن ضهرك المفرود وجلوسك أمام سطح مستوي بيزود إنتباهك واسترجاعك للمعلومات
- بلاش تقضي وقت طويل في غرفة النوم وحاول تغيّر مكان مذاكرتك كل شوية
- ابعد عن التفكير في المذاكرة وقت الراحة لأنها بتزود إرهاق مخك
- أحيانًا بيخدعك المخ بالنوم للهروب من الضغط المستمر بسبب التوتر
- خليك هادي واسمع موسيقى بتحبها واتكلم مع المقربين منك في موضوعات مختلفة
- دراسة بتأكد إن المذاكرة النشطة بتقلل إحساسك بالنوم
- ذاكر بالكتابة واقرأ جزء من المحتوى بصوت عالي كأنك بتشرح قدام الطلبة
- خلي المحتوى مرسوم في شكل خرايط ذهنية وفكّر في أبسط شكل يسهّل عليك حفظه
- حافظ على عدد ساعات نوم مناسبة ( من 6 لـ 8 ساعات يوميًا)
- مهم تشرب مياه باستمرار وتاكل وجبات متوازنة من الألياف والبروتينات وتقلل السكريات والنشويات
فوائد المذاكرة في الهواء الطلق
- دراسة بريطانية بتقول إن فهم وحفظ المواد الدراسية في الهواء الطلق بيزود استيعاب المعلومات
- بتزيد فرص تحقيق درجات عالية وبتتحسن جودة مهارات التواصل خصوصًا عند الأطفال
- بيزيد التركيز والانتباه وبتتخزن المعلومات في الذاكرة طويلة المدى
- بتتحمس لممارسة نشاط بدني في فترات الراحة وده بينعكس على التركيز والذاكرة
- بتقل فرص التعرض للشاشات اللي بينعكس تأثيرها على الصحة وبتسبب صعوبات في التعلم
- بتطور القدرة على التفكير التأملي والفلسفي اللي بيعمق الفهم
- بيدربك على التأقلم والتركيز وسط ظروف معينة أو مُشتتات محيطة
- الخبراء بيأكدوا إن الوجود في الهواء الطلق جنب مكان فيه مناظر طبيعية بيحسن المزاج وبيقلل التوتر
- التأمل في البيئة المحيطة وقت الراحة بينشط الحواس وبالتالي القدرة على الاستيعاب
- الجلوس في مكان مناسب بيساعدك تحقق أكبر استفادة من أشعة الشمس
ومنها الرؤية الأوضح للكلام المكتوب وبالتالي بيقل إرهاق العين
خطوات المراجعة الصحيحة قبل الامتحان
- مراجعة كل أجزاء المنهج قبل الامتحان هدف كل الطلاب ولكن التحصيل العالي له طرق محددة
- كتاب Make It Stick بيقدم نصائح للمراجعة السليمة أهمها إن تكرار قراءة التفاصيل والشرح غير مفيد
- دراسة في جامعة واشنطن بتأكد إن قوة التحصيل في حل الأسئلة لأنها بتساعدك تسترجع المعلومة وتحدد نقاط ضعفك
- رسمك لصورة بتبسط التفاصيل الصعبة وبيقوي فهمك وتذكرك وكتابة النقاط الهامة بخط الإيد بتزيد التركيز
- اربط بين المعلومات الصعبة بأخرى قديمة وقسم مذاكرتك على الأيام لإن تكثيف المعلومات في يوم واحد بيقلل استفادتك
- للتأكد من استيعابك حل امتحانات قديمة اتمرّن باستمرار على طبيعة الاسئلة المتطلبة للتفكير الناقد والفهم دون الحفظ
- قسم مذاكرتك كل 45-40 دقيقة بينهم 10 دقائق راحة واعرف إن استمرار المراجعة لساعات طويلة هيضعف ذاكرتك وهيسبب تداخل في المعلومات
- خصص ساعات النوم من 6 – 8 ساعات يوميًا لإن دراسات كتير بتأكد على أهمية النوم في قوة التحصيل والاستيعاب
