ماعنديش مانع حد يعمل السيرة الذتية لـ والدي.. تصريحات رانيا فريد شوقي في أحد البرامج التلفزيونية
تحدثت الفنانة رانيا فريد شوقي، في أحد البرامج التلفزيونية، عن مشوارها الفني وتفاصيل علاقتها بوالدها الفنان الراحل فريد شوقي، وحياتها الشخصية.
ونعرض لكم أبرز تصريحات رانيا فريد شوقي في البرنامج كالتالي:
– قُلت لـ بابا لو مدخلتنيش الفن هطفش وهعيش في أمريكا عند خالتي.
– أنا خدت من بابا جين التمثيل، لأني الوحيدة في إخواتي اللي بحب التمثيل، وواخدة من شخصيته حب الناس والمهنة، وأنا من الشخصيات الملتزمة.
– ماما كانت هي الوحش في البيت، وبابا ماكنش بيتدخل، وساعات بيقومها من تحت لـ تحت.
– مش معنى إن أبويا فريد شوقي يبقى الناس مرحبة بيا في المجال.
– لو حد خد مكاني في أي دور بقول ده رزق بتاع ربنا ماليش نصيب فيه، وبقول ربنا شايل ليا الأفضل.
– كان فيه مسلسل قبلته واشتغلت فيه 3 أيام وأنا على مضض لأن الورق والتركيبة مش شخصيتي، وقُلت الواحد يغير جلده، وأتفاجئت إني اتشالت وعرفت من الجرايد، واللي صورته اترمى.
– بابا كان دايمًا يقول أنا كلمتي عقد.
– مكنش عندي مشكلة إني أطلع أم لـ 7 أطفال، لازم الفنان يخرج برا النمط المعروف، وأنا بتعمد على التنوع في أدواري.
– بابا كان كبير العيلة الفنية، ودايمًا كان أستاذ فاروق الفيشاوي وأحمد زكي ومحمود عبد العزيز ونور الشريف، عندنا في البيت، واتربيت على إيديهم.
– زوجي هو العوض الجميل، وبخاف من الحسد والعين لأنهم أصعب من السحر، وقبل ما أنزل أي صورة بقرأ المعوذتين وآية الكرسي.
– عملت دور راقصة وسببلي مشكلة مع والدي.
– بختار أدواي من خلال عين المشاهد، هل الورق شدني وهل الكلام منطقي؟، وهل الدور هيأثر في العمل ولا لأ؟.
– ملك بنتي ورثت حب الفن، ومش هقدر أعارض دخولها الوسط الفني، إذا كان فريد شوقي ماقدرش عليا أنا هقدر عليها؟.
– الست النقاقة تغور، واللي مش نضيفه في بيتها حاجة صعبة.
– أنا ماعنديش مشكلة حد يعمل سيرة حياة والدي فريد شوقي، والأهم جودة العمل والاختيار، لأني عندي عقدة من الأعمال اللي اتعلمت لفنانين ومنجحتش.
– نفسي أقدم عمل عن معاناة الأسر اللي عندهم أولاد من ذوي القدرات الخاصة.
– أنا مش شاطرة خالص ولو دخلت الإنتاج هطلع مديونة مش خسرانة.
