فى الساعات الخيرة علاء عز رئيس اتحاد الغرف التجارية طلع فى تصريحات تلفزيونية وقال محدش يشتري أجهزة كهربائية دلوقتي ولا يخزن أي سلع لأن الفترة الجاية هتشهد انخفاضات كبيرة وان ده هيحصل خلال شهر من دلوقتي بحد أقصى .. عز وضح كلامه وقال ان عمليات الافراج عن البضايع فى الموانئء المصرية بتزيد بشكل ملحوظ وخلال ايام قليلة هيكون تم الافراج عن كافة السلع المحجوزة فى الموانئ بسبب ازمة نقص العملة الأجنبية وأكد ان المصانع هتستلم المواد الخام وهتبدأ تعيد تسعير المنتجات وفقا للأسعار الجديدة.
وفى اليام اللى فاتت حصل انخفاض في أسعار السلع الأساسية بنسبة تجاوزت 27% وتم عمل خفض إضافي 14% خاص بأسعار الزيت، والسلاسل التجارية الكبيرة بدأت في خفض السعر وده أدى إلى خفض الأسعار في محال البقالة والتجزئة
طب الأسعار هتنزل بعد شهر تحديدا؟ وايه اللى هيحصل هيخليها تتراجع ؟
مصر خلال ايام هتستلم الدفعة الأخيرة من صفقة راس الحكمة والبالغة 20 مليار دولار كمان وصلت شريحة جديدة من قرض صنندوق النقد بقيمة حوالى 850 مليون دولار وهيوصل قريب جزء كبير حوالى 1 ونص مليار دولار من برنامج التمويل والدعم اللى هيقدمه الاتحاد الاوربي لمصر وطبعا زيادة الحصيلة الدولارية هتؤدي الى زيادة المعروض من الدولار ووفقا لقوانين العرض والطلب واليات السوق اللى بيتم تطبيقها فى سعر الصرف متوقع هبوط كبير جدا فى سعر الدولار .. ومع انخفاض الدولار هتنخفض بالتبعية معظم أسعار السلع زي مواد البناء الحديد والاسمنت والتشطيبات وكمان اسعار العربيات هتنزل واسعار اليلع الغذائية ونسبة الانخفاض مش هتكون قليلة وده لأن الانخفاض فى سعر الدولار هيوصل لحوالى 25 % مرة واحدة
وفى اخر تقرير ليها توقعت مؤسسة “بي إم آي للأبحاث” ان الجنية المصري هيعوض جزءء كبير من خسايره خلال الفترة المتبقية من 2024
ومع إعلان حصول الحكومة على دفعة دولارية جديدة كشفت مصادر مصرفية ان فيه توقعات بتراجع قوي في سعر الدولار في السوق المصرية في الفترة الجاية من مستويات الـ 48 جنيه حاليا إلى 40 جنيه في نهاية مايو يعني بعد حوالي 40 يوم من دلوقتي.
وفي تصريحات مهمة لوزير المالية محمد المعيط، على هامش اجتماعات الربيع لصندوق النقد والبنك الدولي أعلن ان مصر بتترقب الحصول على تدفقات دولارية ما بين 25 الى 30 مليار دولار من دلوقتى لآخر شهر يونيو مع نهاية السنة المالية الحالية.
طب ايه علاقة كل ده باجتماع لجنة السياسة النقدية الاستثنائي فى 6 مارس اللى فات ؟
كل اللى بيحصل حاليا فى ملف سعر الصرف مبنى على قرار البنك المركزي فى الاجتماع ده بتحرير سعر صرف الجنيه وفقا لآليات السوق ولو ملاحظين من بعدها بدات تحصل انفراجة كبيرة فى ملف السولة الدولارية
