لو تليفونك اتسرق.. أعرف إزاي تقفل حساب انستاباي وتفتحه على تليفون جديد

أكتر من 6 مليون مواطن مصري يستخدموا تطبيق “انستا باي”، عشان يقدروا يحولوا فلوس أو يستقبلوها في أسرع وقت ممكن، ورغم إن التطبيق ده بيقدم مزايا كتير، إلا أن البعض بيقع في مشكلة كبيرة قدامه، وهي لو موبايله اتسرق يعمل إيه في انستاباي؟

كلنا عارفين إن لو موبايلك اتسرق هتنهار لأن عليه كل بياناتك وده غير حساباتك البنكية مفتوحة عليه على تطبيق انستاباي، لكن ماتقلقش البنك المركزي المصري مأمنك بدرجة كبيرة.

بس لازم حضرتك تعمل شوية حاجات لو موبايلك اتسرق، أولها توقف شريحة موبايلك وتبلغ الشركة اللي تابع لها بكده، بعدين تطلع شريحة جديدة، وبالتالي تطبيق إنستاباي على التليفون المسروق هيتعطل تمًاما ومش هيتفح أصلا على الموبايل.

ولما حضرتك تستخرج شريحة تليفون تانية وتيجي تشغلها على هاتف محمول جديد، ممكن ببساطة تقدر تستعيد حساب تطبيق إنستاباي اللي تم وقفه على التليفون المسروق، وبالتالي هيكون الحساب البنكي آمن جدا من السرقة أو الاختراق.

ولو ناسي، فخطوات التسجيل في تطبيق إنستاباي، هي إنك تحمل تطبيق إنستاباي على الهاتف من خلال جوجل بلاي أو للآيفون من آب ستور، بعد كده تدخل الرقم القومي المسجل لدى البنك، ثم تعمل حساب وكلمة مرور خاصة بالتطبيق.

بعد كده، هتحدد الحساب البنكي وتضيفه، وتحدد عنوان الدفع اللحظي IPA الخاص بك، وأخيرا تعمل باسورد أو كلمة السر الخاصة بحسابك IPN PIN، وبس كده يا سيدي.