في أيام بتعدّي زي موج البحر، ضحكة تيجي فجأة، وبُكا بعدها بدقايق، وممكن ما تفهمش نفسك، تفتكر إنك مش طبيعي أو مش متّزن، لكن الحقيقة إنك إنسان.. والمشاعر مالهاش جدول ولا توقيت ثابت.
خليك صادق مع كل لحظة
لو فرحت، ماتقولش ده مش وقته ، ولو زعلت، ماتقولش انا المفروض أكون مبسوط.
كل إحساس بييجي في وقته الصح، حتى لو شكله غلط، الصدق مع إحساسك بيخليك سليم من جوه، حتى لو الدنيا حوالَيك مش مفهومة.
ماتكبتش الفرح علشان الزعل.. ولا الزعل علشان الفرح
المشاعر مش بتلغي بعض، الزعل مش عدو للفرحة، هم زي الليل والنهار، بييجوا ويمشوا، ويتبدلوا، فلو لقيت نفسك بتضحك وإنت لسه مدمّع، اعرف إن دي طبيعتك.. مش خلل.
المشاعر مش متضادة.. هي متعاقبة
زي دقّات القلب، طلعة ونزلة، والأتنين لازم يكملوا بعض علشان تفضل عايش، فماتحاولش تمسح لحظة علشان تحافظ على التانية، سيبهم ييجوا، ويمشوا، وهما لوحدهم هيفهّموك أنت فين.
لما يومك يبقى متقلب، إوعى تفتكره فوضى، ده يوم حي، يوم حقيقي، واليوم اللي بتحس فيه بكل حاجة.. هو يوم عشت فيه بجد.
