في ظل اهتمام المصريين في الكويت وفي الخارج بصفة عامة بمباردة استيراد السيارات قدم أحد المتخصصين كل المعلومات عن طريقة استيراد السيارة وإدخالها إلى مصر ، والرد على جميع الاستفسارات بدءا من تسجيل البيانات وتحويل الأموال وجميع المعوقات التي قد تواجه المواطن خلال عملية الاستيراد من خلال هذا الملخص.
1️⃣ الإجراءات:
1- نزل تطبيق سيارات المصريين بالخارج.
2- اعمل حساب جديد وهيطلب منك إيميل ورقم تليفون، وهيبعت رسالة على الإيميل لتفعيل الحساب.
3- بعد تفعيل الحساب بيطلب منك رقم أيبان (IBAN) حسابك بالكويت وحسابك في مصر ورفع إثبات الإقامة بالخارج (صورة البطاقة المدنية) + صورة بطاقة الرقم القومي (مش شرط تكون سارية، وممكن صورة جواز السفر) + كشف حساب بنكي لمدة 6 شهور من الحساب اللي فيه فلوس الوديعة.
⚠️ ما تعملش كشف الحساب غير في نفس اليوم اللي هتحول فيه الفلوس، عشان المعاملة ما تترفضش ويطلبوا منك كشف حساب جديد.
4- بعد رفع المستندات بتحدد نوع العربية وسنة الصنع وحجم الموتور وفئة العربية.
5- بيظهر لك بيانات التحويل البنكي ومبلغ الوديعة المطلوب.
6- بتروح تحول مبلغ الوديعة من المزينى للصيرفة بالدولار وتزيد على المطلوب 4 دولار عمولة البنك الأهلي
لو عن طريق بنك وسيط تزيد 100 دولار (تقدر تسأل وانت بتحول التليكس مباشر ولا عن طريق وسيط).
مع ملاحظة أن بنوك الكويت بتحول مباشر ومش بيكون فيه بنك وسيط وده بلغني بيه موظف البنك الوطني وأكد إن مفيش بنك وسيط، وبالفعل الحوالة وصلت كاملة.
وكمان المزيني حوالته بتوصل كاملة لأن عنده حساب دولاري في البنك الأهلي ومفيش بنك وسيط
ولو حابب تتأكد قبل التحويل اتصل بالبنك اسأل تحويل التيلكس لمصر بيكون عبر بنك وسيط ولا لأ.
( البنوك الوسيطة ظهرت في تحويلات المقيمين في السعودية والامارات، لكن المقيمين في الكويت محدش قابل المشكلة دي).
7- في أغلب الأحوال بعد يومين عمل هتظهر الحوالة اللي أنت بعتها وبياناتها وهيقولك جاري استخراج الموافقة الاستيرادية.
8- ناس كتير بعد وصول الوديعة بيوصلها رسالة “تم إيقاف المعاملة برجاء تحديث كشف الحساب”، وقتها بتطبع كشف حساب تاني ويفضل يكون ظاهر فيه معاملة تحويل الوديعة وترفعه على الأبلكيشن مرة ثانية.
9- في خلال أسبوعين تقريباً هيجيلك تنبيه إن الموافقة الاستيرادية جاهزة، هتطبعها وهتلاقي منها نسخة اتحفظت في الملفات في موبيلك.
10- بتروح الصليبية تعمل تصدير للعربية وتسلم اللوحات الكويتية وتاخد لوحات للتصدير.
11- تاخد الموافقة الاستيرادية مع مستنداتك اللي رفعتها على الأبلكيشن وهى (بطاقة كويتية + كشف حساب بنكي) وتديهم لشركة الشحن اللي هتشحن السيارة على المينا في مصر.
12- بعد وصول العربية مصر هيتم البدء في إجراءات التخليص الجمركي في حوالي أسبوع وتستلم السيارة خالصة بعد دفع رسوم حوالي 12 ألف جنيه رسوم متقرفة في المينا شاملة عمولة المخلص الجمركي، ولو السيارة فيها GPS بيزيد 5 الاف جنيه تكلفة عرض.
الرسوم دي قابلة للتغيير في أي وقت لأنها كلها نثريات (زي طفاية ومفرقعات و ملف مرور وفحص وكشف وفحص مخازن).
13- في حالة مصادفة أي مشكلة عليك الاتصال برقم الشكاوى الخاص بالمبادرة (0020215999) وتقديم شكوى ومتابعتها يومياً لحين حلها، هيطلعوا روحك شوية لكن هيحلوها في الاخر عن تجربة.
2️⃣ أسئلة شائعة:
20- عملت تسجيل ورسالة التفعيل ما وصلتش على التليفون ولا الإيميل؟
ج: لازم تفحص الرسايل المهملة (Junk) لأن أوقات بتوصل عليها، وناس كتير ظهرت معاهم مشاكل في بريد الـ Hotmail فحاول تستخدم بريد ثاني زي Gmail أو iCloud.
21- مش لاقي نوع عربيتي متاح في التطبيق؟
ج: قدامك حل من اثنين:
الأول وده الأساسي انك تضيفها من التطبيق من خانة “استعلم عن إمكانية استيراد سيارتك”، وتنتظر لما يضيفوها على التطبيق مع الاتصال بخدمة العملا لعمل شكوى، والرد عليها في خلال 5 أيام عمل.
التاني إنك تشوف أقرب حاجة لعربيتك وتدفع وديعتها وتبقى تعمل استبدال بعدين.
22- محتاج شهادة مالك أول؟
ج: لو عربيتك موديل 2020 وفوق فمش محتاج، 2019 وتحت فمحتاج، وبتسلمها مع ورقك لشركة الشحن.
هتلاقي مكتوب على التطبيق من أول 2019 لكن لو كلمت الكول سنتر هيبلغوك إنها من أول 2020 طبقاً للتعديل الجديد.
لو عربيتك قبل 2020 محتاج يكون معاك صورة من جوازك اللي كان معاك وقت ما اشتريت العربية لإثبات إقامتك وقت الشرا.
23- هل كشف الحساب لازم يكون مختوم وموقع من البنك؟ وهل يكون مصدق من أي جهة؟
ج: اسهل حاجة تطلع كشف الحساب من تطبيق البنك مجاناً بصيغة pdf وبدون الحاجة إلى ختم أو توقيع أو تصديق، وفيه كمان بنوك عندها مكائن متطورة اسمها XTM ممكن تطلع كشف الحساب عن طريقها.
24- تحويل الوديعة بيكون ازاي؟
ج:
- إما عن طريق البنك سواء من الفرع وتطلب منه حوالة تليكس بالدولار وده رسومه غالية (20 دينار) مقارنة
بالمزينى 1.750 والى يعتبر ارخص عمولة تحويل على مستوى الكويت - عن طريق شركة المزينى للصيرفة وهما عارفين نظام التحويل ده كويس لانهم من بداية المبادرة شغالين فيها من شهر نوفمبر ٢٠٢٢ يعنى بقالهم ٤ شهور تقريبا ومروا بكل الحالات الخاصة بالمبادرة
25- التحويل عن طريق البنك أفضل ولا عن طريق الشركات؟
ج: التحويل عن طريق البنك غالي مقارنة بشركات التحويل لكن في حالة رد المبلغ لأي سبب بيكون الرد في حسابك فوراً.
لكن في حالة التحويل عن طريق المزيني بيرجع المبلغ لحساب الشركة نفسها وبتحتاج تروح الشركة في عشان تستلمه أو تعيد تحويله مرة ثانية.
كمان المزيني أسهل في بيانات التحويل مقارنة بموظف البنك اللي هيطلع روحك على ما يعمل معاملة التحويل أو الأبلكيشن اللي مفيهوش خانات لرقم المدفوعة أو رقم الطلب، لكن دي حلها اكتب بيانات إضافية وحط الرقمين.
26- حولت المبلغ والحوالة لم تظهر في حسابك رغم مرور فترة طويلة، أتصرف ازاي؟
ج:
عشان الحته ده بنفضل تروح لشركة المزينى للصيرفة عشان تقوم بتحويل وديعتك لان فى موظف البنك الاهلى أ/محمد السجينى 98859864 موجود فالمزينى وبيقوم بمتابعة جميع المعاملات الخاصة بالوديعة وعندهم خبرات كافيه وملمين بكل مايخص التحويل ومتطلباته
27- وصلتني رسالة إن تم رفض المعاملة، إيه التصرف وامتى أقدر أقدم تاني؟
ج: أهم سبب لرفض المعاملة هو إنهم يشكوا إن مبلغ الوديعة اتحولك من مصر، وده بيكون عن طريق استعلام من البنك المركزي المصري عن معاملاتك البنكية، وعن طريق إن كشف الحساب الكويتي اللي انت بترفعه يكون مفيش فيه مبالغ تذكر ويتم إيداع أو تحويل مبلغ الوديعة قبل المعاملة.
ودي حلها إنك تظبط كشف حسابك وتقدم مرة ثانية، يعني حاول تبعد عن الإيداعات النقدية المباشرة وخلي المبالغ بتحويل من حساب إلى حساب، يعني لو عندك حسابين مثلاً وأنت قدمت من حساب فاضي ارجع قدم مرة ثانية من حساب الراتب أو الادخار أو ترفق معاه شهادة راتب أو ما يثبت إن راتبك بتستلمه كاش وهكذا، ومفيش فترة معينة تنتظرها، وأعتقد هيكون فيه تسهيل في الإجراء ده بعد التعديلات الأخيرة.
وفي حالة الرفض بيتم رد فلوسك على نفس حسابك الكويتي في خلال أسبوع وهيتخصم منها مبلغ بسيط رسوم التحويل.
28- عندي حساب في البنك الأهلي بالدولار ومحتاج أشترك في المبادرة هل ينفع أشترك؟
ج: لأ ما ينفعش تدفع من مصر لأن هدف المبادرة زيادة الحصيلة الدولارية من الخارج، فالأمر ده مرفوض ولو سحبت الفلوس من مصر واودعتهم في الكويت هيتم رفض المعاملة بعد الاستعلام البنكي عنك، ومش مطلوب منك فتح حساب بنكي في مصر الآن تقدر تضيفه في أي وقت.
29- أنا معنديش رخصة في الكويت وشركات السيارات رافضة تبيعلي من غير رخصة؟
ج: الحل إنك تعمل المعاملة على أبلكيشن المبادرة باسمك عادي، بس تشتري السيارة باسم أي صديق ليك عنده رخصة كويتية ويسلمها لشركة الشحن ويكتب اسمك في بوليصة الشحن، وأنت اللي هتستلمها في مصر وبتكون إجراءاتها بإسمك عادي.
30- هل لازم استلم العربية بنفسي في مصر؟
ج: لأ، تقدر توكل عنك قريب درجة أولى، أب أو أخ أو ابن أو زوجة أو زوج.
التوكيل بيتعمل من القنصلية المصرية ومش محتاج تصديق خارجية كويتية، رقم صيغة التوكيل على موقع القنصلية هو رقم 20.
في حين رقم صيغة توكيل المخلص هو 22.
لازم تنسق مع المخلص عشان يعملك أو للي هينوب عنك تصريح دخول للمينا عشان تستلم العربية إن شاء الله.
31- إيه أفضل شركة شحن وأفضل مخلص جمركي؟
ج: الحقيقة شركات الشحن لمصر كتير وكلهم متعاونين في موضوع المبادرة وبيسهلوا كل الإجراءات المطلوبة منهم، والشركات في الكويت عندهم مخلصين في مصر بيدوك أسمائهم لعمل توكيلات لهم.
وشركات الشحن في الكويت عملوا باقات لأسعار الشحن مع التقسيط حوالي 200 دينار، لكن مش حابب أرشح أي شركة منعاً للإحراج، لكن ممكن لاحقاً أحطلكم قائمة بأسماء وأرقام تليفونات بعض الشركات.
لو تعرف مخلص في مصر تقدر تتفق معاه، لو ما تعرفش فشركات الشحن هنا عندهم مخلصين في مصر يقدروا هم يخلصوا كل حاجة.
