حرص المطرب والملحن رامي جمال على توضيح سبب مساعدته للنقاش الموهوب أحمد سالم، بالإضافة إلى حرصه على توجيه رسالة إلى الموهوبين الذين لم تأت الفرصة إليها بعد.
حيث نشر رامي جمال مقطع فيديو له عبر حسابه الشخصي على موقع تبادل الصور والفيديوهات “إنستجرام”، وقال فيه: “عايز اتكلم عن حاجة مهمة جدًا علشان أنا شايف القبول اللي ربنا كاتبه للفنان أحمد سالم، أحمد فنان بدرجة مشوفتهاش في حياتي مرتين تلاتة، وأنا شايف أن الحب اللي الناس حبته ليه دي حاجة مش بتحصل كل يوم”.
لماذا بادر رامي جمال بمساعدة أحمد سالم؟
وتابع قائلًا: “وأنا فرحان جدًا أن مازال الصوت الحلو والفن الحقيقي الناس بتحبه وبتدعمه، وفيه ناس كتير فرحانة وبتقولي شكرا أنك بتساعد أحمد لكن أنا مش بساعده، أنا بساعد نفسي كفنان وكملحن أن الوسط الفني يبقى فيه أصوات زي أحمد عشان دي حاجة بترقى بالذوق العام ودي حاجة بقينا محتاجينها جدا كلنا”.
وأضاف: “وأنا اتربيت في بيت أهلي أن الفرصة لما بتيجي لحد بتبان أن ربنا اللي باعتها، احنا كلنا أسباب لبعض يعني ممكن أنا أحاول أسهل على أحمد مشواره في الفن ودي حاجة بالنسبالي قمة في السعادة لأن في الأخر”.
رامي جمال يرد على منتقديه
وأوضح رامي جمال أنه لم يفعل ما فعله من أجل التريند، حيث قال: “أنا وقت ما شوفت الفيديو بتاع أحمد مكنش منتشر بالشكل دا، لأن فيه ناس تانية بتقولي أنت بتساعد بس عشان التريند، والله عمرها ما كانت شخصيتي ولا هتبقى، لأن مفيش حد ضامن وهو بيحاول يعمل حاجة ونيته مش صافية أنها في الأخر هتوصله للنتيجة اللي هو عايزها”.
وتابع: “واللي باعتين ليا كدا أكيد موهوبين ومستنيين الفرصة وأكيد متضايقين وشايف أن الفرصة اللي ربنا اداها لأحمد هما يستحقوها بس والله بطمنكم، جايلكم كلكم الفرصة والرزق عند ربنا بمعاد وربنا لو سخرني لأحمد وسخر الجمهور لأحمد في أنه يبقى حابه دلوقتي فرصكم كلها جاية”.
وأضاف: “عايز اقول لكل الناس اللي ما خدتش الفرصة أن ربنا يديكم أكتر من اللي اتمنتوه وإن شاء الله زي ما ربنا وقفني لأحمد ووقف ناس ليا زمان هيوقفلكم ناس، وبوجه رسالة لاحمد وبقوله كفايا برامج لحد ما نخلص الأغاني”.
