حلت الفنانة جليلة محمود، ضيفة في برنامج “كلام الناس” الذي تقدمه الإعلامية ياسمين عز، على قناة mbc مصر.
وإليكم أبزر تصريحات الفنانة جليلة محمود، خلال الحلقة.
– أنا عندي ابن راح بالحسد، وأنا مش حابة حد يشوف ولادي ولا يعرف هما مين ولا أتوجع تاني، لأن الوجع مستمر معايا من 1998 لغاية دلوقتي، الحسد كان في كلمة اتقالت وبعدين تليفون جه قالولي ابنك عمل حادثة.
– لما حد كان يسألني معاكي أولاد إيه كنت بقول 3 ولاد وبنت، كان بيتقالي في وشي أه ما إنتي اللي زيك يجيب ولاد، ابني راح، كان عنده 18 سنة وفي كلية التجارة وزي القمر وراح، فأنا مبحبش يكلمني عن ولادي ولا يقولي مين ولادك ولا أظهر ولادي ولا أنزل لهم صور، والحسد مذكور في القرآن، وبدعي ربنا ما يوجعني تاني، ودي أصعب حاجة الواحدة ممكن تمر بيها.
– اللي حسد ابني توفى الله يرحمه وكان معانا في المسرح، وأنا أذكر ده للفنانة الجميلة فيفي عبده في ساعتها بصتلي إن إزاي أنا قُلت كده لما سألني على ابني، كأنها كانت حاسة إن هيجيلي خبر ابني في تليفون، شوفت أيام ربنا وحده اللي يعلم بيها، وربنا يجعله في الجنة.
– أنا بعتبر إن حياتي وسمعتي ملك ولادي، ولو بصيت لأي طفل وعاجبني لازم أقول الله أكبر، يعني أنا خايفة من البصة حتى علشان ولادي، من أول ما خلفت وأنا عندي الإحساس ده ولكن أتصابت مفيش فايدة.
– لو اتعرض عليا أعمل دور فردوس عبد الحميد في الضاحك الباكي في السن ده مش هوافق، يعني هطلع أم لطفل وأنا في السن ده إزاي.
– لازم الفنان يكون عنده ذكاء في اختيار الدور تبع سنه وقميته وإمكانياته، ويمكن هي حبًا في التمثيل والأداء والشخصية اختارت إنها تعمل الشخصية دي، ولكنها أسأت الاختيار.
– بعد ما أتخرجت من معهد الفنون المسرحية أتجوزت على طول، كنت حابة العيلة كنت عايزة أعمل زي اللي أتربيت عليه، وكان شرطي على جوزي إني أكمل في الفن، لأني أول ما اتعينت اتعينت في المعهد.
– كنا قريبين في السن فهو كان متفهم وموافق إني أعمل اللي أنا عايزاه، بس كان شرطه إني معملش حاجة تسئ ليه ولا أدوار إغراء وده العهد اللي أنا خدته على نفسي.
– انضميت للمشاركة في مسلسل اللعبة الجزء الرابع، والمخرج معتز التوني رشحني للمشاركة في العمل ووافقت على الفور خاصة أني تعاونت معه من قبل في مسلسل الكابتن أنوش.
– زوجي كان يحبني جدا من ناحيته فقط وأنا فكرت فى تكوين بيت وأسرة وعائلة .. لذا وافقت على الزواج .
– أنا ممثلة مسرح وأقوم بأعمال مسرحية و من أهم أعمالي فيلم اليتيم و الذئاب ،ساكن قصادي، الشياطان و الكروة ،انسات وسيدات ، شعبان تحت الصفر ، اسف للإزعاج.
– العشرة اقوى من الحب فأهم شيئ وجود التجانس والرحمة والطيبة والعشرة الطيبة.
– دور فتحية في فيلم الكيت كات كان ست ملعب، لكن أنا معملتش أي مشهد ملعب أو فيه اغراء خلال الفيلم ولم يسبب أي مشاكل، كنت بتضايق عندما كان يناديني الجمهور “بالهرم”.
– يكفني العمل مع الفنان الراحل محمود عبد العزيز، والمخرج داود عبد السيد.
– أولادنا أكبادنا تمشي على الأرض، كنت أستيقظ في الخامسة صباحًا لتجهيز الطعام لأولادي قبل ذهابي للتصوير.
– ذات مرة تركت التصوير مع الراحل اسماعيل عبد الحافظ، بسبب إجراء ابنتي عملية جراحية في عينها، سبت الدنيا كلها وقعدت تحت رجل بنتي في المستشفى، وباباها رجع من السفر وفضلنا معاها.
