رانيا عيسوي زوجة ثلاثينية تقدمت إلى محكمة الأسرة في التجمع الخامس، طالبة الخلع من زوجها بسبب بخله الشديد قائلة «بيأكلنا بواقي السمك.. مع أنه عنده محل سمك كبير».
رانيا تشكو زوجها في محكمة الأسرة
تقدمت رانيا الزوجة البالغة من العمر 35 عاما إلى محكمة الأسرة في التجمع الخامس طالبة الخلع من زوجها، وسردت لـ تحيا مصر تفاصيل مشكلتها مع زوجها الذي يبخل عليها، ولا يصرف عليها، حتى أنه يجلب إليها بقايا الأكل.
وقالت رانيا في دعواها ضد زوجها «أنا أتجوزت من 3 سنين فاتوا وبعد سنة جواز بس أكتشفت بخل جوزي عليا، كان بيرفض يشتري لي أي حاجة وديما مستخسر كل حاجة فيا، وخلفت منه بنت، لكن بردو فضلت عادة البخل فيه متغيرتش».
زوجة: بخيل أوي وبيأكلني بواقي
وتابعت رانيا أمام محكمة الأسرة، جوزي كان بيأكلني بواقي السمك، بالرغم أنه عنده محل سمك كبير ومشهور جدا في التجمع الخامس لكن كان ديما بخيل ويجيب لي بواقي السمك يقولي بلا جبت لك أكل.
وأضافت رانيا قائلة «جوزي كان بخيل لدرجة أنه كان يستخسر يشتري لي هدوم وأنا اللي كنت بشتري من شغلي الخاص، وأقوله عايزة أشتري هدوم يرد يقولي وأنا مالي إنزلي إشتري إنتي من اللي معاكي ما أنتي معاكي فلوس».
رانيا: أنا اللي بشتري الهدوم
وأكملت رانيا عن مشكلتها مع زوجها قائلة «أكتر حاجة زعلتني منه لما الصيف دخل والجو بقى حر والمراوح بتكهرب قولت له هات لنا تكييف عشان الجو، قالي لا وتكييف ايه ده متعب جدا، وفجئت بعدها أنه ركب جهازين جداد في المحل، طيب هات واحد من القديم في البيت قالي لا، وأنا خلاص مبقتش مستحملة المعيشة دي معاه».
وأختتمت رانيا حديثها قائلة «أخرى ما زهقت منه روحت لمحامي وقولت له أنا عايزة أرفع قضية طلاق على جوزي وأخلص منه عشان أنا زهقت خلاص، وحكيت له أن جوزي بخيل ومش بيصرف عليا وأنا اللي بجيب كل حاجتي وحاجة بنتي من فلوسي أنا وشغلي الخاص، وهو مش بيعبرنا وديما بيجيب لنا أقل حاجة».
