أكد الإعلامي مصطفى بكري؛ أن البلاد تمر بظرف تاريخي صعب مثلما تمر به البشرية لافتا أن الرئيس عبد الفتاح السيسي يشعر بمعاناة المصريين.
وقال بكري خلال برنامج “حقائق وأسرار” المذاع على قناة “صدى البلد”: “الحقيقة أنا عايز أتكلم في موضوع شائك بيهم العالم كله في ظل هذا الظرف التاريخي الصعب اللي بتمر بيه البشرية ونائب وزير المالية كان بيقول إن العالم بيشهد أزمة في الأسعار لم يشهدها منذ 2008 ومش معني كدة أن مفيش مسؤولية مجتمعية وحكومية على اللي حاصل”.
وأضاف: “الغلابة بيعانوا والطبقة المتوسطة بتعاني؛ والرئيس قال إنه يتمنى أن المواطن المصري ياخد راتب 20 ألف جنيه؛ وكمان بتجيلنا رسوم من حيث لا نحتسب وفرق كبير بين معاناة الناس واحساس الناس وبين لغة التحريض اللي بنسمعها هذه الأيام وهي لغة ذات أجندة سياسية”.
وتابع: “البلد مش بلد الرئيس السيسي بس دي بلد كل مواطن مصري؛ النهاردة ياللي أنتوا من برة واللي شغالين من جوة واللي انتوا بتدغدغوا الناس كنا بنعاني زمانكم وانتوا بتحكموا لا كان في احتياطي استراتيجي ولا موازنة ودة مش معناه أن احنا بنغض البصر عن مشاكل أهلنا وعن المعاناة اللي بيعانوها؛ وعن الغلبان اللي تعبان واللي رغيف العيش كواه وتعبه والناس اللي بتكح تراب”.
وأكمل: “كل مواطن مصري ليه حته في البلد ومن حقه يتمتع بكل حقوق المواطنة؛ احنا شعب طموحاته بسيطة مش عايز يتبهرك أحنا عايزين لقمة العيش ونعرف دفع فاتورة الكهرباء احنا داخلين في رمضان وكل أسرة نفسها تلاقي لقمة العيش الكريمة”.
واختتم: “الرئيس قدامه كل حاجة وبيشوف الأرقام وانتهى زمن أن الرئيس ميعرفش حاجة احنا بنخوض معارك متعددة؛ احنا بنخوض معركة التنمية والرئيس حاسس بالمعاناة وهل كل الوزراء بيعملوا زي الرئيس لا مبيعملوش في ناس لازم تمشي وعشان كدة الناس منتظرة التعديل الوزاري”.